మబ్బు గుర్తులు

// మబ్బు గుర్తులు //

ఒక్కోసారి ఆకాశం దోసిట్లో దూకి, అరచేతుల్లో ముద్దిచ్చి పోతుంది
ఎప్పటికీ ఉండిపొమ్మని అడుగుతాను
నువ్వు అవనివై ఉండగా నేనెలా వదిలిపోగలనని ఆ మొక్కల మోముల్లో కురిసి వొదిగిపోతుంది
తన రాల్చిన గుర్తులు పువ్వుల్లోంచి నా నవ్వులుగా వొంపుకుంటాను
ఆ క్షణం విరహాన్నీ ప్రేమిస్తాను
నీ చినుకుల కబుర్లు
నువ్వెళ్ళాక నీ గురుతుల గుసగుసలు
నాకు నేను అందనంత దగ్గరగా నన్ను చుట్టేస్తాయి
అవును..చేరువైనా, దూరమైనా ఆనందమే !
కప్పు కాఫీతో నిన్నూహిస్తూ పాడుకుంటాను

నిన్ను ఇచ్చేయమని అడుగుతాను
నన్ను శూన్యం చేసి, నీలో నన్ను కొత్తగా చూపుతావు

-సరిత భూపతి
27/7/17